ரூ.2000 ரூபாய் நோட்டுகள் புழக்கத்திலிருந்து நீக்கப்படுவதாக ரிசர்வ் வங்கி அறிவிப்பு வெளியிட்டுள்ளது.
2016-ம் ஆண்டு எடுக்கப்பட்ட பணமதிப்பிழப்பு நடவடிக்கையை அடுத்து 2,000 ரூபாய் நோட்டுகளை ரிசர்வ் வங்கி அறிமுகப்படுத்தியது. கடந்த 2018-ம் ஆண்டு மார்ச் 31ம் தேதி 2,000 ரூபாய் நோட்டுகளின் புழக்கம் 6.73 லட்சம் கோடியாக இருந்தது. இது 2023, மார்ச் 31ம் தேதி 3.62 லட்சம் கோடியாக குறைந்துள்ளது. புழக்கத்தில் உள்ள 2,000 ரூபாய் நோட்டுகளின் மதிப்பில் இது 10.80 சதவீதமாகும். இந்தத் தொகையில் பெரும்பகுதி கருப்புப் பணமாக இருக்கக்கூடும் எனக் கருதப்படுகிறது.
எனவே அவற்றை வங்கிக்குக் கொண்டு வரும் நடவடிக்கையாக ரூ.2000 ரூபாய் நோட்டுகள் புழக்கத்திலிருந்து நீக்கப்படுவதாக ரிசர்வ் வங்கி அறிவித்தது. அதன் படி ரூ.2,000 நோட்டுகளை வங்கிகள் வாடிக்கையாளர்களுக்கு இனி விநியோகிக்கக் கூடாது என்ற நடைமுறை அமலுக்கு வருகிறது. மேலும்
2023 செப்டம்பர் 30 தேதி வரை ஏற்கனவே விநியோகிக்கப்பட்ட 2000 ரூபாய் நோட்டுகள் திரும்ப பெறப்படும் எனவும் ரிசர்வ் வங்கி அறிவித்துள்ளது.
அதற்காக எந்த ஒரு வங்கிக் கிளையிலும் 2000 ரூபாய் நோட்டுகளை மாற்றிக் கொள்ள முடியும் என ரிசர்வ் வங்கி அறிவித்துள்ளது. மேலும் அவ்வறிக்கையில் 2,000 ரூபாய் நோட்டுக்கள் திரும்பப் பெறப்படுகின்றதே தவிர பணமதிப்பிழப்பு செய்யப்படவில்லை எனவும் ரிசர்வ் வங்கி கூறியுள்ளது.
