சீன விஞ்ஞானிகள், தங்களது புதிய தொழில்நுட்பமான குறைந்த அட்சரேகை நீண்ட தூர அயனோஸ்பிரிக் ரேடார் (LARID) மூலம் எகிப்தின் பிரமிடுகள் மற்றும் மிட்வே தீவுகளுக்கு மேலே பிளாஸ்மா குமிழ்கள் உருவாகியுள்ளதை கண்டுபிடித்துள்ளனர். இந்த அரிய நிகழ்வு செயற்கைக்கோள் தகவல்தொடர்புகளை பெரிதும் பாதிக்கக்கூடியது என்று கூறியுள்ளனர்.
கடந்த ஆண்டு நிறுவப்பட்ட LARID, ஹவாய் முதல் லிபியா வரையிலான 9,600 கிலோமீட்டர் தூரத்தை உள்ளடக்கிய பரந்த பகுதியில் பிளாஸ்மா குமிழ்களை கண்காணிக்கிறது. குறிப்பாக, கடந்த நவம்பர் மாதம் ஏற்பட்ட சூரியப் புயலுக்குப் பிறகு பிளாஸ்மா குமிழ்களின் அளவு கணிசமாக அதிகரித்திருப்பது கண்டறியப்பட்டுள்ளது. பிளாஸ்மா குமிழ்கள் என்பவை அயனமண்டலத்தில் உருவாகும் மின்னூட்டப்பட்ட துகள்களின் குழுவாகும். இவை சூரியக் காற்று மற்றும் புவி காந்தப்புலத்தின் தொடர்பால் ஏற்படுகின்றன. பிளாஸ்மா குமிழ்கள், ரேடியோ அலைகளை சிதறடிப்பதன் மூலம் செயற்கைக்கோள் தகவல்தொடர்புகளை பாதிக்கின்றன. பிளாஸ்மா குமிழ்கள் பற்றிய சீனாவின் ஆய்வு, செயற்கைக்கோள் தொடர்புகளை மேம்படுத்துவதற்கும், இராணுவத் துறையில் புதிய தொழில்நுட்பங்களை உருவாக்குவதற்கும் பெரிதும் உதவும் என எதிர்பார்க்கப்படுகிறது.
